|
اويونلار ، توزاقلار شوونيست حاكميتين ميللي حركته قارشي يوموشاق سياست لري قاجارلي آغاممد
گونئي آذربايجان ميللي حركتي نين باشلانيش تاريخي حاقدا چئشيتلي دوشونجه لر وار. كيمي بو حركتين باشلانيشين ستارخان، خياباني ، پيشه وري، شريعتمداري حركتلرينه، كيمي ايران ايسلام انقلابيندان سونراكي ايللرده بير سيرا مدني حركتلره، كيمي قوزئي آذربايجانين استقلالينا، كيمي لري ايسه چؤهره قانلي نين سئچكي لره قاتيلماسيني ، حركتين باشلانقيجي سايير. اصلينده بو حركت لرين هامي سينين بو گونكو ميللي حركتين يارانماسيندا رولو اولوب. فارس شوونيزمينين بو گونكو دؤنمده ان بؤيوك دستكچيسي، ايران ايسلام جمهوريتي – حاكمييتينه ايسه بو مسئله بيزدن داها آيدين دير. 1979-اونجو ايل دئوريميندن سونرا ، ايران آدلانان اؤلكه ده چئشيتلي ميلت لر آراسيندا ، آيريليقچي ائتنيك حركت لري باشلاميشدير. بو حركت لرين سويه سيندن آسيلي اولماياراق، هاميسي ايرانين اراضي بوتؤولويونه درين ضربه لري اولا بيلردي. همين ايللرده بو حركت لر باسديريلسادا ، حاكميتين بير يوللوق ماراق داييره سيندن سيلينمه ديلر. بير سؤزله بو گونكو شوونيست حاكميت گوجو اله كئچيرديكدن ايندييه دك ، ميلي حركت لرله ، اؤزلليكله گونئي آذربايجان ميللي حركتيله هميشه ماراقلانيب، بو حركت لري اؤنله مك اوچون ان ايرنج سياستلره ال آتيب. بو سياست لرين نئجه اويقولانماسي و سونوج آليب-آلماماسي بير يانا، اونلارين ايرلي سورولمه سينه ائتكين ندن لر ماراقلي دير. اونا گؤره كي همين سياست لري دؤنم باخيميندان اينجه له ديكده ، ميلي حركتين گوجلنمه و گليشيم سوره جينده، آچيقجا گؤرمك اولور. بو يازي دا ميلي حركتيميزه قارشي حاكميتين ايرلي سوردويو سياست لر ، دؤنم باخيميندان اينجه لنه جك. بو سياست لرين داشيديغي آماج ، ميلي حركته قارشي اولومسوز ائتكي لري آراشديريليب، حاكميتين گله جك سياست لري ايسه اؤن گؤروله جك. حاكميتين حركتيميزه قارشي گله جك ده هانسي اويونلار اويناياجاغيني اينديدن اؤن گؤرورسك، اونون قارشيسيني آلماقدا ان اويغون كسمته (تصميمه ) راحاتجا گليب چاتا بيله ريك، دوشونجه سينده ييك. بيرينجي آشاما (حركت يارانماسين): شوونيست ايران ايسلام جمهورييتي يارانديغي ايللردن ايندييه دك آردي كسيلمه ين بحرانلارلا اوغراشميش و اوغراشماقدادير. بو بوحرانلار و اونلاري آشماق اؤزلويونده بو گونكو حاكمييتي بيرتورلو سيريمستميشدير. دئمك ده حاكميت هميشه بحران آختارماقدا، بحران ياراتماقدا، بحرانلاري آشماقدادير. بونونلادا حاكمييت ايچينده چئشيتلي آراشديرما قروپلاري ، بو بحرانلاري آراشديريب،اونلارا قارشي تدبيرلر ايرلي سورورلر. پتانسيل اولاراق اؤلكه ده بحران يارادا بيله جك بيرينجي ائتكنلردن ميللي حركتلر دير. حاكمييت بونو آيدينجا بيلير. دئوريمين ايلك ايللرينده بلوچ لار، كوردلر، عرب لر ، توركمن لر و آذربايجانلي لار آراسيندا چئشيتلي سويه ده آيريليقچي حركت لر اولماسي بونا آچيق ثبوت دور. حاكميت بو حركت لري باسديرسادا ، اونلارين يئني دن يارانماسيني اؤنله مك ايسته يير. بونونلادا بو حركت لري يارادا بيله جك فاكتورلاري آرادان گؤتورمك ايسته ييب. بو فاكتورلار اولمازسا، حركت ده يارانماز دوشونجه سي بيرينجي آشامايا يؤن وئرير. گونئي آذربايجان ميللي حركتينه گلديكده ، قوزئي آذربايجان ايستقلاليندان باشلاياراق، بيرينجي آشاماني چوخ كوبودجا اويقولاميشدير. قوزئيين ايستقلاليني گونئي آذربايجان ميللي حركتين يارانماسيندا ائتگيلي سانان حاكميت بوتون گوجونو بو فاكتورا قارشي يؤنلتميشدير. قوزئي آذربايجان بير اؤرنك اولاراق گونئيي ائتگي له يه جكدير و ائتگي له دي ده. آنجاق حاكميتين سياست لري بونا اؤز منفي تاثيريني بوراخدي. حاكميت قوزئيين استقلالينين ايلك گونلريندن اؤز گيزلي اؤرگوتلرين ايشه كئچيردي. قوزئي آذربايجانا قارشي اولان سياست لري بئله سيرالاماق اولار: 1- قوزئي ده حاكميت دايره لرينده نفوذ ائديب، اونلارين سياستلرينده گونئي آذربايجانا قارشي دئييشيك ليك ياراتماق. 2- قاراباغ ساواشيندا ائرمنيستان طرفينده دايانماق. 3- ميللي دوشونجه لري ايرلي سورن ائلچي بي حاكمييتيني دئويرمك. 4- قوزئيين گليشمه سيني اؤنله مك ، هميشه قاراباغ سورونون ديري ساخلاماق. 5- ... بوتون بونلار اونا گؤره ايرلي سورولوردو كي قوزئي آذربايجان گونئي اوچون بير اؤرنك اولماسين. گونئي ده كوتله قوزئيين فلاكت لريني گؤروب ايرانا داها آرتيق باغلانسين.
ايكينجي آشاما (حركت بوغولسون): حاكمييتين بوتون تدبيرلرينه باخماياراق ، قوزئي آذربايجان ايستقلالي اؤز تاثيريني گونئي ده بوراخميشدير. گونئي ده ميللي دوشونجه ياراتميشدير، آز – چوخ گيزلي فعاليت ائدن لرده واريدي. حاكمييت بو آشامادا تزه جه يارانميش ميللي حركتي يئرينده بوغماق و حركتين قارشيسيني آلماق، اونو تجريد ائتمك ايسته ييردي. او زامان حاكمييت ميللي حركتين گوجلنمه سينين، يئريييب يولا دوشمه سينين قاباغين آلماق ايسته ييردي. بونون اوچون ده ميللي حركتين گوج قايناغي اولان ميلت آراسيندا تانينماماسي اساس مسئله ايدير.
اوچونجو آشاما(حركت كؤتو تانينسين): بو آشامادا حاكميت ميللي حركتين توپارلاما گوجونو(بسيج ائتمه) هابئله دونيادا ياسال و مشروع تانينماسيني اؤنله مك اوچون حركتي كؤتو دامغالارلا لكه لمه يه چاليشميشدير. اؤلكه نين ايچينده حركت چي لري ،دين سيز، كومونيست، آمئريكا آداملاري، توركيه جاسوسو، لات و لوت ، ... كيمي تانيتديرماغا چاليشميش، دونيادا ايسه اويغون نه گليرسه حركته ياپيشديرميشدير. اؤرنه ييً اسلامچي، فاشيست، كومونيست،.... دؤردونجو آشاما(حركت غيرسياسي تانينسين) بو آشامادا حاكميت ان كسگين آنجاق يوموشاق آراجدان حركته قارشي سالديري يا كئچميشدير. دئمك اولار حاكميت بو آشاماني اويقولاماقدا چوخ يئتگين جه داورانميشدير. حاكميت ده استراتژيك مركزينده اولانلارا بو سورون چوخ آيدين دير كي حركت ايچريده گوج توپارلاييب و او گوجو ميللي ايستقلالا دوغرو بؤنلتمك اوچون سياسي تانينمالي دير. سياسي و هدف يؤنلو اولاراق حركته قوشولان كوتله ، ايسته نيلن زامان موباريزه صفينه بيلمه دن كئچسه ده، چوخ بؤيوك پئشمانليق دويغوسويلا گئري چكيلر. سياسي هدفي اولمايان كوتله آخينين ، حاكميت اؤز ايسته ديي آرخا يؤنلده بيلر. دونيادا ايسه سياسي هدف داشيمايان حركت ، بؤيوك گوجلرين سياسي دنگه لرينه يئرلشمز و ماراق داييره لرينين ايچينده اولماز. اولابيلر كي اؤرنه يي آمئريكا كيمي اؤلكه نين ديش ايشلره باخاني ايراندا هانسيسا توپلومسال مسئله ني اورتايا آتسين، ايشچي لرين، قادينلارين حقوقونون تاپدالانماسيندان دانيشسين، آنجاق بو دانيشماق و يا بيلديري ساده جه ايراني كامو اويوندا كؤتولمك آماجينا قوللوق ائدير. آمئريكا كيمي بؤلگه ده ماراقلي اولان بير اؤلكه نين دنگه لرينه ، معادله لرينه ئورلشمز بو حركت لر. ائتنيك تمللي سياسي بير حركتين سونونج آلماسي اوچون بو ايكي شرط آنا قوشوللاردير.. يعني ايچري ده كوتله ني سفربر ائتمك و اولوسلار آراسيندا دونيا گوجلرينين دسته ييني آلماق. شوونيست حاكمييت چوخ حيله كارجاسينا بو ايكي آنا خطه سالديرميشدير. بونون اوچون ايسه ائله يوموشاق حركت ائتميشدير كي ميللت چيلرين چوخونلوغونو چاشديرميشدير. ميللتچي لردن چوخو بو توزاغين نه اولدوغونا وارمادان ، حاكمييتين آراجينا چئوريلميشدير. شوونيست حاكمييت بو آشاماداكي سياستينين باشيندا ، "حركتي سياسي يوخ، مدني – كولتورل و اجتماعي حركت تانيتديرماق" گئدير. دئمك ده حاكميت ميللي حركتين سياسي حركت اولاراق تانينماسيني اؤنله مك يسته يير. بو آماجدا حركتي سياسي حركت اولاراق تانيدان ائتكن لره سالديرير. چاليشير ميللت آراسيندا و دونيادا حركتي ائله تقديم ائتسين كي حركت اجتماعي و مدني حركت كيمي گؤرونسون. بو آرادا حركتي سياسي حركت اولاراق گؤسترن ائتكن لره توخونماق گركير. سياسي حركتي اجتماعي حركت لردن آييران ائتكن لر بونلاردير: 1- سياسي گوج هدف اولاراق 2- سياسي سيمبول 3- سياسيي هدف ايچرن ايدئولوژي 4- سياسي ليدر 5- اؤرگوت 6- تورپاق باغلي ليغي 7- آرديجيل ليق 8- كوتلوي اولماق
1-سياسي گوج هدف اولاراق: بو ائتكن لر اولمازكن حركت سياسي گورونمز. سياسي گؤرونمه ديكجه ايسه دونيا گوجلرينين ماراق داييره لرينه و سياسي دنكه لرينه يئرلشمز. حاكميت بوتون بونلاري ياخشي بيلير و بو ائتكن لري سييقلاشديرماغا، حركتدن آييرماغا چاليشير. حاكمييت چوخ يوموشاقجاسينا اؤزل آراجلاريلا ، حركته اؤز ايسته دييي و اؤزونه قازانان هدف لري آشيلايير. بو هدف لر ميللت چي لرين بيانات لاريندا، شعارلاريندا اؤزونو گؤسترير. باخماياراق كي بو هدف لرده بيزيم حركتين ايسته دييي آماجلاردان دير، آنجاق تمل آماج دئييل. بؤيوك آماجلاريميزين ايچينده چوخ كيچيك اؤيه اولوشدوران آماجلاردير بونلار. اؤرنه يي بيزيم بيانات لاردا و شعارلادا "تورك ديلينده مدرسه" و يا " اصل 15 گرك اجرا اولسون" ، " تورك لره تلوزيا و باشقا يئتيرگنلرده توهين اولماسين" كيمي شعار و ايستك لر گؤرونور. بونلار بيزي بير اجتماعي و كيمليك آختاران مدني بير حركت لر كيمي اورتايا قويور. و يا اؤتن ايللرده بابك قالاسي قورولتاييني ، حاكميت مدني و ايلنجه لي حركت كيمي گؤسترمه يه چاليشيردي. چئشيتلي موسيقي قروپلاريني"اداره ارشاد اسلامي" قالايا چاغيرير و كوتله ني اؤز ايسته ديي كيمي قيدالانديرير. دونيايا حركتي اوز ايسته دييي كيمي تانيتديرماغا چاليشيردي. قالايا گئتمك ايسته ين ميللت چيلرين چوخونو توتوقلاييب، گئتمه يينه ياساق قويدوغو حالدا ، بير سيرا اولكه نين رسمي قازئت لرينده ، توريسم شركت لري طرفيندن قالايا گئديشله باغلي تبليغات گئديردي.
2-سياسي سيمبول سياسي سيمبوللار، ائتنيك تمللي حركت لري سياسي اولاراق گؤسترير. هابئله او حركتين گوج توپارلاماسينا،وار اولان گوجو بيرلشديرمكده بؤيوك رول اوينار. حاكميت بو گون حركتيميزده سياسي سيمبولوموزدان قورخور. اونا گؤره ده بوتون گوجونو بو سيمبوللارين اورتايا چيخماسيني اؤنله مه يه ، سيمبوللاري گؤزدن ساليب سيييقلاشديرماغا قويور. يئرسيز دئييلدي كي 1382 اينجي ايل بابك قالاسي قورولتاييندا ، ميللي بايراغيميز دالغالانديقدان سونرا، حاكميت بو قورولتايا سون قويدو. حاكميتين اويونلارينين هاميسين او بايراق پوزدو. بايراق حركتيميزي تام سياسي و تام ميللي اولاراق گؤستردي. اؤرك لرده بايراق سئوگيسي يارانارسا ، آرديجا"اؤنجه وطن، وطن ساغ اولسون " سؤيلمي ده بوتون اختلافلارا واختيندا سون قويماغا؟؟. حاكميت بونو چوخ ياخشي بيلير، اونا گؤره ده بير سيرا سؤيلم لري ياراتماقلا و بو سؤيلم لري ميللي حركته آشيلاماقلا ف بايراق سئوگيسيني سيييقلاشديرير. "بيزيم بايراغيميز محمدامين بايراغي دير" ، " او بايراق بيزي پارچالايا بيلر" ، " او بايراق بوتون آذربايجانا خيانت دير"، "او بايراق يالنيز بير تشكيلات بايراغي دير" ، "اونلارين حاققي يوخدور ميللته بايراق سئچسينلر" كيمي سؤيلم لر اؤزده ميللتچيليك يؤنلو گؤرونسه ده ، اصلينده بو سؤزلرين هاميسينين آرخاسيندا حاكمييتين چيركين و ايرنج حيله لري دايانير. حاكميت بو سؤزلري اؤزو دييه بيلمز و بو سؤزلري سن، من كيمي ميللتچي اولاراق تانينانلارين آغزي ايله اورتايا قويماليدير، قويوردا.
3-ايدولوژي بيزيم ميللتي بير جبهه ده توپلاياراق، و اونو شووونيست حاكميته قارشي موباريزه يه ايته له ين ان بؤيوك تمل ديرك لردن ايدولوژي دير. ميللي ايدولوژي بيزيم ان يوكسك آرزولاريميزي، ايستك لريميزي، قايغي لاريميزي اؤزونده بارينديرير. حاكميت ايسه بونا سايماز قالاماز. ميللتي اؤز چيركين ايستك لرينه قارشي توپارلاياجاق ائتگني محو ائتمك ، سيييقلاشديرماق لازيم ديرحاكميت اوچون. بو آماجلا حاكميت بيزيم ايدئولوژي ميزه سالديرير. ائله بير اورتام ياراديب كي ان كيچيك ايستك لر اوزره اختلافيميز اولسون. "فدرالچي يا استقلالچي" ،" ايرانچي سان يا آذربايجانچي" ، "گونئي چي سيز يا بوتؤو آذربايجانچي" و ... كيمي ميلي ايدئولوژي ميزده آشاغي دوزئي لرده اولان آشامالاري قابارتماقلا اختلاف تؤره دن يانليز حاكميت و اونون آراجلاري دير. يازيق ميللت چيلر ايسه بيلمه يه رك بو قونولار حاقدا تارتيشيب، ساواشماقلا واختلاريني كئچيريرلر.
4-ميللي ليدر بو تون ائتنيك تمللي سياسي حركت لرين و سياسي دئوريم لرين سونونج آلماسيندا ، ميللي ايدئولوژي، ميللي اؤرگوت و ميللي ليدئر 3 آنا ديرك ساييلير. ليدئري اولمايان ميللي حركتين نتيجه آلماسي مومكون دئييل. گؤرونمه ييب ده . دونيا ميللي سياسي حركت لرينده بير اؤرنك تاپماق اولماز كي ليدئري اولماسين و نتيجه آلسين. حاكميت ده بو ائتكنه هميشه سالديرميش دير. 1374-اونجو ايل سئچگي لريندن بو گونه دك ، ميلي ليدئره قارشي بوتون اويونلارا ال آتميش. بير ياندان شخص اولاراق ليدئرين اؤزونو ايشكنجه ائتميش، توتوقلاميش،ائو دوستاغي ائتميش، اجتماعي ايليشكي لريني كسميش، باشقا ياندان ايسه ليدئر قارشيتلي سؤيلمي ميللت چيلره آشيلاميشدير. "ايندي ليدئر زاماني دئييل" ، "حركته ديكتاتور لازيم دئييل" ، "گرك رهبريت شورايي اولسون" ، "او ايران آدامي دير" ، ... كيمي سؤيلم لر ميللتچيلرين يوخ، حاكميتين فابريكالارينين اورونودور.
5-اؤرگوت هامي يا آيدين دير كي توپلومسال بير آماجا اولاشماق اوچون توپلومو بير آرايا گتيريب، بير هدفه دوغرو يؤنلنديرن اؤرگوت لازيمدير. اؤرگوت سوز ميللي هدفه اولاشماق مومكون دئييل. حاكميت اؤزلويونده بؤيوك بير اؤرگوتدور. بو اؤرگوته قارشي يالنيز گوجلو بير اؤرگوت گركلي دير. بيزيم ميللي حركتيميزده ايسه نئچه ايللردير اؤرگوت دن قاچيش ايليمي(تمايل) حاكميت طرفيندن يئرلشديريلميشدير. " من هئچ تشكيلاتا باغلي دئييلم" ، "بيزه تشكيلات يوخ ،حركت اؤزو لازيم دير" ، "فراتشكيلاتي دوشونون"؛ ... كيمي سؤيلم لر ،حاكميت طرفيندن آشيلانميش سؤيلم لردير. اوسته ليك وار اولان اؤرگوتلره قارشي گوجلو تخريباتلار گئدير. حركتين ان گوجلو تشكيلاتينا قارشي ائله پسكولوژيك سالديري لار وار كي ، ميللت چيلرين بير سيراسي اوتشكيلاتين قارشيسيندا چئشيتلي قروپلاشمالارلا دايانماقداديرلار.
6-تورپاق باغليليغي هر بير ميللي سياسي حركتين نتيجه آلماسيندا تورپاق باغليليغي و تورپاقبيتيشيكليگي بؤيوك اؤنم داشييير. بيز آذربايجان آدينا باغلانميشيق، آذربايجاني اؤزوموزه دوغما وطن بيليريك. آذربايجانين تورپاقلاري ايسه هم قوزئي آذربايجان ، هم ده توركييه ايله بيتيشيب. بو بيزيم حركت ده ان بؤيوك اوستونلوك دور. حاكميت ايسه بو اوستونلويو آرادان گؤتورمك ايسته يير. آذربايجان آدينا باغليليق ، اورتاق وطن حيسسي ، نه يولووايله اولور آرادان گئتمه ليدير. 1993-اونجو ايلده آذربايجانين بير بؤلمه سينين آديني دئييشديريب، اردبيل ائتمك بو مقصده اويغون دور. بو گون زنگانلي لارين ، قزوين ليلرين چوخوندا آذربايجان سئوگي سي يوخدور. بو ايسه اونلاري حركتين ايچينه آلماقدا، ميللت چيلرين قارشيسيندا چتينليك تؤره دير. دونيادا دا داغينيق يئرلرده اولان ائتنيك تمللي حركتلره ، سياسي حركت اولاراق دير وئريلمز.
7-آرديجيلليق سياسي اوزمانلارين باخيشيجا ، ائتنيك تمللي سياسي حركت آرديجيل اولمالي دير. حاكميت ايسه بيزيم حركتي اؤزل قونولار اوزره ، موقتي جوشقودان ، دويغودان تؤرنميش حركت كيمي سونماق ايسته يير. خورداد اولايلاري كيمي گؤستري لرين تكرارلانماماسي اوجون ، حاكميت اليندن گلني اسيرگه مير. بونا گؤره كي بئله حركت تكرار اولورسا ، داها اونو اؤزل بير كاريكاتورا قارشي اعتراضا باغلاماق چتين اولاجاق.
8-كوتلوي اولماق ميللي حركت بوتون ميللته باغلي حركت اولمالي دير. يعني كوتله ني دالينجا داشيمالي دير. بئله اولمازسا اؤزل بير كسيمين حركتي كيمي ديرلنر و بئله ديرلنيرسه، آغيرليغين ايتيره بييلر. سياسي آغيرليغا يييه لنمه ين حركت ايسه سياسي دنگه لره يئرلشمز. حاكميت چاليشير بيزيم حركتي بيرسيرا اؤرنجي لرين حركتي كيمي و يا اؤزل يوكسك اوخوموشلارين حركتي كيمي ايرلي سورسون. سون زامانلاردا اؤيرنجي حركاتي دييه بير سؤيلمه داها آرتيق توش گليريك. بو آدين بئله حاللانماسيندا حاكميتين رولون اؤرت باسدير ائتمك اولماز. اؤيرنجي حركاتي اولاراق اؤزلريني تقديم ائدنلرين اؤرگوتلريميزه قارشي ائلشتيري آديندا سالديري لاري ايسه آچبق بونون ثبوتودور. حاكميت بو سياسيت لرين بير سيراسينا بللي زامانلاردا داها آرتيق اوستونلوك وئرسه ده اصليننده هئچ بييرين دايانديرماييب. يعني بو سياست لري ياناشي يوروتمكده دير.اولابيلسين اينديكي زاماندا داها آرتيق حركتي سياسي اولمايان حركت كيمي تانيتديرماغا اوستونلوك وئرسين، آنجاق لكه لمك دن ،كؤتولمك دن ، بوغماقدان، تجريد ائتمك دن ده داشينماييب، هاميسيني يوروتمكده دير.
گله جك آدديم لار: شوونيست حاكميتين گئچميشدن بو گونه دك يوروتدويو چيركين سياست لره آزاجيق توخوندوق. آنجاق سور بورادادير كي حاكميت تكجه بو سياست لره يتينمه يه جك. اونون گلجكده ده داها ايرنج سياست لري گؤزله نيلير. گوجلو بير تشكيلات دوشمنين گلجك اويونلاريني قاباقجادان سئزه بيليرسه ، حركت تام تپكيسل ليكدن چيخيب، اؤنجوللويه دوغرو گئدر. واختيندا دوشمنين حركت لريني اؤنله يه جك تدبيرلر اورتايا قويابيلر. حركت گوجلنديكجه حاكميتين چيركين سياستلرينده يئني ليكده اورتايا چيخاجاق. ايندييه دك گؤروندويو كيمي توتاليتر حاكميت لر مخالفتين گوجلندييينده سيرالاياجاغيميز آدديملارا ال آتيبلار: • اوغورلاماق: بو سياست له حاكميت ميللي حركتي ضررسيزلشديرير. سيلاحين اليندن آلير. حاكميت ميللي حركتين كوتله اوچون جاذبه لي يئرلريني اوغورلاييب و كوتله ني اؤز طرفينه چكه بيلر.بيزي حاكميت دن آييران و ميللته چكيجي ائدن ميلي ايدئولوژي ميزين اؤيه لريندن زامانيندا آز گئدرلي(هزينه لي) سايديقلارين اوغورلاياراق، اؤزلري قوللانا بيليرلر. دئمكده حاكميت بوگون ميللي حركتين ايستك لرين اوزو پروقرام اولاراق ايرلي سوروب، كوتله نين كؤنلون قازانا بيلير.اؤرنه يي حاكميت ايچينده اولان بير سيرا تانينميش و ميللت آراسيندا مثبت تانينان شخص لر 15-اينجي اصلين اويقولانماسيني، تورك ديلينده مدرسه لرين آچيلماسيني، آذربايجان اوچون تلوزيا آچيلماسيني اؤز پروقراملاريندا يئرلشديريرلر. بئله ليكله تانينميش شخصين سؤزو و اصل 15 دئمه سي ميللتچي دن داها جاذبه لي گؤرونور. بو ايندييه دك حركتيميزده اؤزون ثبوت ائديب. اكبر اعلمي نين ، ميرحسين موسوي نين تبريز كيمي يئرده ،بوگونكو بوتون فعاللارين دئمه سيندن داها چوخ تاثيرلي دير. بئله ليكله هم كوتله ني يؤنلده بيليرلر، همده يئري گلديكده كوتله يه يئني قهرمانلار سونا بيليرلر. يئني ليدئرلر حاكمييتين تام دئنتيمينده(كنترولوندا) اولماق شرطي ايله يئري گلديكده بوگونكو ايگيدلريميزدن داها راديكال حركت لري گؤره بيلرلر. • آزديرماق: حاكميت اؤزل آراجلاريلا بير سيرا قونولارا مئيدان وئرمكله حركتي آنا خطيندن اوزاقلاشديرا بيلر. اؤرنك چكمه دن دئمه لييك كي بيزيم چوخلو دوشمنلريميز، چوخلو سورونلاريميز وار. انجاق لازيم دئييل دوشمن لرين هاميسيلا بيرآندا موباريزه يه كئچك، سورونلارين هاميسين گونو بو گون چؤزمه يه چاليشاق. حاكميت اؤزل آراجلاري ايله اؤنجه ليك داشيمايان سورونلاري ائله قابارديب، شيشيرده بيليركي حركتين اساس گوجو همين سورونلاري چؤزمه يه يؤنه لر. حركتين انرژي سي حاكميت دن يانسييب، باشقا يئرلره يؤنه لر. • ايرلي و يا گئري ايته لمك:حاكميت بيرسيرا سيخينتيلارلا حركتده كي اونجوللري گئري اوتورماغا و موباريزه ده ديري آز اولان آشامايا گئري له يه بيلر. هابئله ترسينه بيرسيرالاريني تحريك ائتمك له حركتين گوجونو چوخ انرژي ايسته ين ، هله زاماني گلمه ين ايشلره ده ايته له يه بيلر. • شاققالاماق: حركتين چوخ گوجلنه جه يي و عئيني حالدا حاكميتين ايسته يينه قارشي اولاراق ، اؤرگوتله نه جه يي زامان ، حاكميتين شاققالاما سياستي ده الوئريشلي اولابيلر. يارانميش اؤرگوتو پارچالاماق و يا آيري آيري هدفلري بير اولان اؤرگوتلري بير بيرينين قارشيسينا قويماق بو سياستين آنا خطيني اولوشدورور. • موذاكره : واخت گله جك كي حركت دوغرو دوزگون گوجلنه جك، گوج باخيميندان حاكميت له آغيرليغي بير اولاجاق. همين آنلاردا تهرانين هميشه كي سياستي ياني موذاكره يولوايله حركتي آلداتماق سياستي ايشه كئچه بيلر. موذاكره ميدانيندا تهران حاكميتي هميشه حركتي آلداديب. بو دونه ايسه آلدانارساق داها حركت ائتمه يه بيرداها انرژي قالماياجاق. |