کئچن یوز ایلده آزربایجان اؤزللیکله تبریز بازاری اجتماعی- سیاسی حرکتلرده هر زامان آکتیو اولاراق، او حرکتین طالئینده اؤنملی رول اوینامیشدیر. مشروطه حرکاتیندان، خیابانی حرکاتینا قدر، میللی حکومتدن، شریعتمداری حرکاتینا قدر آزربایجان بازاری اؤز آپاریجی رولونا دایاناراق دین ویا شاه ایستیبدادی و هابئله فارس شؤوینیزمینه آغیر ضربهلر ائندیرمیشدیر. ائله محض بو سببه گؤره ایران ایسلام رئژیمی روحانیت و بازارین سیخ ایلیشکیسیندن قوللاناراق، بازارین گوجونو اؤز کونترولو آلتینا آلماغا جهد ائتمیش و اونو حکومتین پایالارینین بیریسی حالینا گتیریب چیخارمیشدیر. بونلارا باخمایاراق کئچن 20 ایلده، گونئی آزربایجان میللی حرکاتینین یئنی فازی هر زامان بازارین حیمایه¬سینی اؤز آرخاسیندا حیسس ائتمیشدیر. 1374-1995 سئچکی حرکاتیندا بازارین موختلیف کسیملری دؤکتورچؤهرقانلیدان حیمایه ائتمیش، خورداد- مای قیاملاری تبریز بازاریندان (راستا کوچه آغزیندان) باشلامیش و ایلک گوندن ایندییه قدر میللی مهبوسلاریمیزین عائلهلرینه یاردیمدا بازارین دانیلماز امه¬یی اولموشدور.
گونئی آزربایجان میللی حرکتینده بو گونه قدر بازارین دستکچی و تداروکاتچی رولو اولسا دا، 2010 ایلینین یول آیینین 8، (1389، تیر 17)-دن باشلایان اعتیصابلا، بازار میللی حرکتده آرتیق اؤنجوللوک ائتمه¬یی ده تجروبه ائتمکدهدیر. ایران حکومتینین وئرگی سیاستینه اعتراض بهانهسی ایله باشلایان آزربایجان بازارینین اعتیصابی، میللی ایستکلرینی اورتایا قویاراق، یالنیز صینفی بیر حرکت اولمادیغینی ثبوت ائتدی. فارس رئژیمینین آزربایجانا اقتصادی-سیاسی آیری سئچکیلیگین دوردورلماسی، آزربایجان تورکجهسینین رسمی دؤولت دیلی اولماسی، آزربایجان سیاسی مهبوسلارینین آزادلیغی و ... کیمی ایستکلرین بازار طرفیندن سسلنیلمهسی، بازارین میللی ایستیقامتده حرکت ائتدیگینی گؤسترمکدهدیر. آزربایجان میللی حرکتینین بو گونکو حساس دؤنمده بازارین تعطیلی اطرافیندا بیر نئچه نقطه¬نی وورغولاماق لازیمدیر؛
تبریز بازارینین تعطیل آکسیاسی تئهران آکسیاسیندان سونرا باشلادی. ایران- فارس اوپوزیسیونو اؤزللیکله یاشیل حرکت و دستکچیلری بو اولایدان قوللاناراق، اونو آزربایجانین یاشیل حرکته قارشی سوسقونلوغونو سیندیردیغی¬نین علامتی کیمی گؤسترمهیه چالیشدیلار. بونا گؤره 3 آیدان اؤنجهدن آزربایجان میللی-سیاسی مهبوسلارینین خبرینی بایکوت ائتمهلرینه رغمن، بازار اعتیصابینی منیمسمهیه باشلادیلار. آما تبریز و دیگر شهرلرین تعطیلی، تئهران بازارینین آچیلیشیندان سونرا دا دوام ائتمهسی و هابئله تئهران بازاری و ایران حکومتینین آنلاشماسینا باخمایاراق، آزربایجان بازاری میللی ایستکلر اوستونده دوروب و آکسیایی بو گونه قدر سوردورمهلری، بازار اعتیصابینین گونئی آزربایجان میللی حرکتینین بیر پارچاسی اولدوغونو آچیقجا تصدیق ائتدی. آزربایجان میللی حرکتی ایسه دفعهلرجه یاشیل حرکتدن حمایه ائتمک اوچون اؤز شرطلرینی اورتایا قویموشدور.
تبریز بازاریندان سونرا درحال آزربایجانین باشقا شهرلری و حتی تئهران بازارینین بؤیوک قیسمتینین تعطیل اولماسی ایکی گرچه¬یی گؤسترمکدهدیر. بیرینجی بو کی تئهراندا یاشایان آزربایجان تاجیرلری زامانیندا تبریز مرکزلی دوشونورلر. بو ایسه گلهجکده گونئی آزربایجان تاریخی-ایستراتئژیک خریته و چیخارلارینی قوروماقدا اؤنملی رول داشییاجاقدیر. ایکینجی بو کی بازار گونئی آزربایجان بوتؤولوگونده سوننتی شبکهسینی قورویوب، ساخلایا بیلمیشدیر. بو ایسه کسینلیکله آزربایجان میللی حرکتینین کوتله ایچینده شبکهسینین برکیشمهسینه یاردیمچی اولاجاقدیر.
تاریخ بویو بازار روحانیتی ساوونموش و اونو مالیه¬لشدیرمهده، واقتیکن دیرچلیشینده قوللوغوندا اولموشدور. گونوموزون ایلیشکیلرینه گلینجه، ایندیلیک بازار ان آزی موللالارین مشروعیتینین دیرکلریندن ساییلیر. بازارین میللی حرکت ایستیقامتینده تعطیل آکسیاسی بوندان دولایی اؤنم داشیییر کی، هم حاکمیتین بو پایانین الدن وئرمهسی آنلامیندادیر، هم ده حکومت ایمتیازلاریندان اوزاق قالمیش موللالاری میللی حرکته سؤوق ائتدیرمهیه سبب اولاجاقدیر.
آزربایجان بازارینین ایستکلرینده میللی مهبوسلاریمیزین آزادلیغی ایسته¬یی، دوستاقدا اولان قهرمانلارین میللت ایچینده نه قدر عزیز اولدوقلارینی نوماییش ائتمکدهدیر. باشقا سؤزله، میللی اؤنجوللری گؤزدن سالماغی هدفلهین ایران ایططیلاعات ناظرلیگینین بوتون چابالاری، بازارین بو ایستیینین کؤلگهسی آلتیندا قالدی.
آزربایجان میللی حرکتی، بوراجان وطن اؤولادلارینین آیدین فیکیر کسیمینی اؤزونه قاتا بیلمیشدیر. بو نه قدر ده گرکن و دیرلی آتدیم اولسا دا، آما میللی حاقلاریمیزی الده ائتمک اوچون کیفایت دئییلدیر. یئترلی آددیم، بازار (میللی بورژوا)، روحانیلر (دین خادیملری) و اوردو (سلاحلی قوهلر) اوچ¬بوجاغینین حرکته قاتیلماغی اولاجاقدیر. بازارین تعطیل آکسیاسی بیرینجی بوجاغداکی قالانین میللی حرکت طرفیندن آلینماسی آنلامینا گله بیلر.
گونئی آزربایجان میللی اویانیش حرکاتی (گاموح) آدینا، میللتیمیزین بازار کسیمینین آکسیاسینی دستکلهیهرک، بونو میللی حرکتین اوغورو کیمی دیرلندیریر و بو اوغورون صاحبلری اولان شهیدلریمیزی و دوستاقدا اولان قهرمانلاریمیزا اؤز تشککورلریمیزی بیلدیریریک.
گونئی آزربایجان میللی اویانیش حرکاتی- مرکزی کومیته
تبریز- 1389-5-2 |
